امریکا سے وفا کے امیدوار

امریکا بہادر کی یہ خوبی ہے کہ اس سے دنیا کا ہر ملک ہر وقت امید لگائے بیٹھا رہتا ہے اور تیسری دنیا مسلم دنیا خصوصاً پاکستان کے سیاستدان بھی اور امریکی عوام کے تو کیا کہنے وہ امریکا ہی کو کل دنیا سمجھتے ہیں۔ باقی کو تیسری دنیا، اس لیے وہ جس دنیا میں رہتے ہیں وہ اور ہی ہوتی ہے لیکن دنیا کے آزاد خودمختار کہلائے جانے والے ممالک بھی امریکا سے ایسے آس لگائے بیٹھے ہوتے ہیں جیسے یہی سب کا مسئلہ حل کرے گا، مسائل تو کیا حل ہوں گے ان میں اضافہ ہی ہوتا رہتا ہے، اس کی وجہ یہ ہے کہ امریکا سے آس لگانے والے جب اس کے پاس جاتے ہیں تو انہیں اپنی عرضداشت پیش کرنے کے بعد کچھ باتیں ماننے کی شرط پر کچھ فوائد مل جاتے ہیں، لیکن باتیں اور شرائط ماننے سے جو مسائل پیدا ہوتے ہیں وہ سائل کو مستقل اس کے در کا گدا بنا دیتے ہیں۔ حالیہ امریکی انتخابات کے بعد صرف تین ایسے تبصرے آئے ہیں جن پر امریکی انتظامیہ کو توجہ دینی چاہیے اور دنیا کو سوچنا چاہیے، ایک روس کا ہے جس کے ترجمان نے واضح طور کہا کہ صدر پیوٹن کا ٹرمپ کو مبارکباد دینے کا امکان نہیں، لیکن اگلے دن پیوٹن نے مبارکباد دیدی، بہر حال ترجمان نے کہا کہ ہم ٹرمپ کے اقدامات دیکھیں گے، وہ یوکرین جنگ کو ہوا دینے والوں میں سے ہیں، دوسرا حماس کا ہے جس نے کہا ہے کہ ٹرمپ بائیڈن والی غلطی نہ دہرائیں جس نے اسرائیل کی اندھی حمایت کی تھی وہ غزہ پر اپنی امریکی برادری کی آواز سنیں، حماس نے متنبہ کیا کہ مسئلے کے حل کی آڑ میں فلسطینی اپنے حقوق میں کمی برداشت نہیں کریں گے۔ اسی طرح ٹرمپ کے گزشتہ دور میں طالبان سے شکست اور وہاں سے افواج کے انخلا کے فیصلے کو یاد دلاتے ہوئے امارت اسلامی افغانستان کے ترجمان عبدالقہار بلخی نے کہا کہ توقع ہے کہ نئی انتظامیہ حقیقت پسندانہ اقدامات کرے گی، اور تعلقات کے نئے باب کا آغاز ہوگا، ساتھ ہی توجہ دلائی ہے کہ ٹرمپ خطے (افغانستان) اور دنیا خصوصاً غزہ اور لبنان میں موجودہ جنگ کے خاتمے میں تعمیری کردار ادا کریں گے۔ ان تین بیانات کے سوا بیش تر سفارتی چاپلوسی کی زبان پر مشتمل بیانات ہیں البتہ ترکی نے بھی غزہ، فلسطین اور یوکرین جنگ کے خاتمے کا ذکر کیا ہے۔ امریکی خارجہ پالیسی کا محور وہاں کے دو ہی ادارے ہیں، پینٹاگان اور دفتر خارجہ یہ دونوں ادارے بین الاقوامی حالات کے تناظر میں اپنے مفادات کے مطابق فیصلے کرتے ہیں۔ مشرق وسطیٰ خصوصاً اسرائیل کے حوالے سے پالیسی میں صدر یا پارٹی بدلنے سے کوئی خاص فرق نہیں پڑتا، افغانستان جیسی مجبوری آجائے تو بڑا فیصلہ کیا جاسکتا ہے۔ اسی طرح مسلم دنیا کو باجگزار بنانے کی پالیسی بھی مستقل رہتی ہے، جبکہ ایک ہی موضوع پر ملکوں کے حوالے سے پالیسی تبدیل ہوتی رہتی ہے، جیسے فوجی حکومت غلط ہے لیکن، مصر، میانمر وغیرہ میں غلط نہیں، دوسرے کے علاقے پر قبضہ غلط ہے لیکن فلسطین اور کشمیر پر پالیسی کچھ اور ہے۔ آزادی اظہار اس وقت تک حق ہے جب تک اسلام، مسلمانوں، قرآن اور پیغمبروں کی شان میں گستاخی ہو، لیکن صہیونیوں کے جبر اور مظالم پر تنقید یہودیت کے خلاف بات کرنا قرار پاتا ہے، ہولو کاسٹ پر تنقید یا اس کے بارے میں جھوٹے پروپیگنڈے کا پردہ چاک کرنا جرم ہے، بلکہ اسرائیلی مظالم پر آواز اٹھانا بھی اینٹی سمٹ ازم ہے اس امریکی رویے کے باوجود اگر کوئی پاکستانی یہ سوچتا ہے کہ امریکا اس کے سیاسی لیڈر کو رہا کرائے گا تو یا تو وہ قومی وقار کا سودا کرنے کو تیار ہے یا عقل سے پیدل ہے کہ امریکا مفت میں کوئی کام نہیں کرتا، بھرپور معاوضہ اور خدمت لیتا ہے۔
پاکستان میں آج کل یہ ہوا چلی ہے کہ ٹرمپ آگیا خان بھی آئے گا، اس کے صحیح ہونے اور غلط ہونے ہر دو صورت میں پاکستان کا نقصان ہے، اگر ٹرمپ کے آنے سے عمران خان رہا ہوتے ہیں تو پاکستان کی کیا اوقات رہ جاتی ہے، پی ٹی آئی کے ایبسلوٹلی ناٹ کی کیا حیثیت ہوگی اور رجیم چینج میں امریکی سازش اور سائفر وغیرہ کی کیا حیثیت ہوگی۔ اور اگر ایسا نہیں ہوا تو،
جدوں آئے گا ساڈا ٹرمپ
کرے گا خان اڈالہ توں جمپ
گانے والوں کا کیا ہوگا، وہ اسے کیسے دیکھیں گے کہ امریکا کو ایبسلوٹلی ناٹ کہنے والا اسی کی آس میں ہے، اس کو محض پروپیگنڈا سمجھا جاسکتا تھا لیکن سابق صدر ڈاکٹر عارف علوی کے مبارکباد کے بیان اور زلفی بخاری کے بیان نے اسے محض پروپیگنڈا سمجھنے والوں کی غلط فہمی دور کر دی، زلفی بخاری نے کہا کہ ٹرمپ کی ٹیم، بیٹی اور داماد سے ملاقات کروں گا، ٹرمپ اور داماد سے میرے تعلقات ہیں۔ دوسرا زیادہ مضبوط ثبوت ڈاکٹر عارف علوی کا مبارکباد کا پیغام ہے، جس میں سابق صدر نے امیدیں باندھنے اور اپنے مقصد کی خاطر امریکی صدر کو سب کچھ قرار دینے کی کوشش کی ہے انہوں نے ٹرمپ کو مبارکباد دیتے ہوئے کہا ہے کہ آپ کی جیت سے موجودہ اور مستقبل کے آمروں پر کپکپی طاری ہے، یہ بلاول کے الفاظ کو دوسرے الفاظ میں ادا کیا گیا ہے، جس کا بہت مذاق بنایا گیا تھا، لیکن علوی صاحب نے اردو میں غلطی نہیں کی ورنہ کہنا وہ بھی یہی چاہ رہے تھے کہ ’’کانپیں ٹانگ رہی ہیں‘‘ اس پر بے ساختہ یاد آجانا ہے کہ ہم کوئی غلام ہیں!! ارے جو حکمران غلام ابن غلام ہیں انہوں نے بھی اس طرح مبارکباد نہیں دی۔ اس پر طرہ یہ کہ سند بھی دیدی کہ جناب جو بھی کہتے ہیں وہی کرتے بھی ہیں۔ گویا
ہم کو اُن سے ہے وفا کی امید
جو نہیں جانتے وفا کیا ہے
سابق صدر کو اس طرح بیان نہیں دینا چاہیے تھا، یہ عام پاکستانی رہنما کے لیے بھی مناسب نہیں تو سابق صدر کے کے شایان شان کیسے ہوسکتا ہے۔
پوری امریکی انتخابی مہم کے دوران یہ چٹکلہ چھوڑا جاتا رہا کہ ٹرمپ آئے گا تو خان بھی آئے گا دونوں کا اقتدار میں آنا، نکالا جانا اور مقبولیت وغیرہ کے علاوہ ذاتی زندگی کی مماثلت کا بھی بڑا چرچا ہے، جیسے تیسری بیوی کا دوسری بار خاتون اول بننا، لہٰذا اب تو پاکستان میں بھی ایسا ہی ہوگا وغیرہ۔
عام طور پر دنیا بھر میں انتخابی مہم اور اقدامات میں فرق ہوتا ہے اور امریکی انتخابات میں بھی ایسا ہوتا ہے لیکن امریکی سیاستدان اور رہنما نہایت ہوشیاری سے بیان دیتے ہیں کہ اپنے ووٹرز کی پکڑ میں نہ آسکیں۔ اس لیے دنیا بھر کے بارے میں جو کچھ کہا ووٹر اس کا حساب کبھی کبھی لیتا ہے لیکن امریکی شہریوں، ٹیکس نظام، ملازمتوں وغیرہ کے بارے میں جو وعدہ کیا اسے کسی نہ کسی درجے میں پورا کیا جاتا ہے، ورنہ جوابدہی مشکل ہوجاتی ہے، دنیا بھر کی مختلف حکومتوں کی نظریں انتخاب اور نتائج پر تھیں اور اب اقدامات پر ہوں گی لیکن پاکستان میں کچھ اور ہوتا ہے ہماری انتخابی مہم میں بھی نوحے ترقی استحکام تبدیلی وغیرہ کے لگتے ہیں لیکن ’’دن بدلے ہیں فقط وزیروں کے‘‘ تک بات رہتی ہے، حالیہ انتخابات کے بارے میں ایک تجزیہ تو امیدوں بھرا ہے جو خان کے پرستار کررہے ہیں اور دوسرا اس کے بالکل الٹ ہے کہ ٹرمپ کے جیتنے سے کچھ فرق نہیں پڑے گا! یہ تجزیہ کرنے والے کہتے ہیں کہ مشرق وسطیٰ اور فلسطین سے متعلق امریکی پالیسی میں حکومتوں کی تبدیلی سے کوئی جوہری تبدیلی اور فرق آنے کا امکان نہیں ہوتا۔ مشرق وسطیٰ اور فلسطین کے تعلق سے امریکا کی یہ پالیسی آج یا کل کی نہیں ہے، یہ قریب قریب سو سال پرانی پالیسی ہے۔ ویسے تو امریکا کی پالیسی ہمیشہ سے ہر جگہ تسلط کی پالیسی رہی ہے، جبکہ فلسطین سے متعلق امریکا کی پالیسی اوّل روز سے اسرائیل کی سرپرستی اور اسے مضبوط کرنے کی رہی ہے۔
بائیڈن نے موجودہ جنگ میں جو کردار ادا کیا شاید کوئی اور نہیں ادا کرسکتا تھا، اس سے زیادہ امریکی ریاست نہیں کرسکتی تھی، اب واپسی کا سفر ہوگا، کب؟؟ یہ ابھی نہیں کہا جاسکتا لیکن جلد ہوگا۔ جہاں تک توقعات کا تعلق ہے موجودہ الیکشن سے کسی بھی خیر کی امید نہیں تھی، اگر کملا ہیرس جیت جاتی تو بھی وہی ہوتا جو ہوتا آرہا ہے، اور ٹرمپ کے جیتنے پر بھی وہی ہوگا جو ہوتا آرہا ہے۔
حکومتوں کی تبدیلی سے زیادہ سے زیادہ جس تبدیلی کا امکان ہے وہ امریکی حکمت عملی کی تبدیلی ہے، مفادات تبدیل نہیں ہوجاتے۔ حکمت عملی کی تبدیلی سے بہت سے لوگ یہ سمجھتے ہیں کہ پالیسی بدل گئی، جبکہ ایسا نہیں ہوتا۔
اب آئیں ٹرمپ کی پالیسی یا پہلے بیان کی طرف جو براہ راست ٹرمپ کا تو نہیں ہے ری پبلکن ترجمان کا ہے، اور یقینا ترجمان جو کہتا ہے وہی پالیسی ہوتی ہے۔ ترجمان نے اسرائیل کی ترجمانی کرتے ہوئے کہا ہے کہ ٹرمپ اسرائیل کی حماس اور لبنان کے ساتھ جنگ کا فاتحانہ خاتمہ چاہتے ہیں ترجمان ایلزبتھ پپکو نے کہا کہ جنگ کی طوالت کے ذمے دار جو بائیڈن تھے۔ انہوں نے اسے مشرق وسطیٰ میں غیر ضروری خونریزی سے تعبیر کیا ہے، اس کی وضاحت نہیں کی کہ ضروری خونریزی کیا ہوتی ہے۔ وہی ناں جو اسرائیل اسی برس سے فلسطینیوں کا خون بہا کر کر رہا ہے۔ اسی طرح 8 اکتوبر کا رد عمل مختلف ہونے کا بیان ہے کہ ٹرمپ ہوتے تو 7 اکتوبر کے حملوں کے جواب میں 8 کو کچھ اور کرتے یعنی ردعمل مختلف ہوتا یہ 9/11 کے بعد کی بحث کی طرح ہے جو اس وقت ٹی وی پر بش کے مخالفین کرتے تھے ان کی رائے یہ تھی کہ ہم اگلی صبح افغانستان پر حملہ کردیتے، شاید اسی قسم کا کوئی رد عمل پپکو کے ذہن میں ہوگا۔ اور فاتحانہ خاتمے میں تو سب کچھ کہہ دیا کہ یرغمالی بھی آزاد کرائیں گے اور حماس کا خاتمہ بھی ہوگا۔ اب نئی حکومت کے سامنے سارا منظرنامہ ہے وہ سبق سیکھتے ہے یا ہمیشہ کی طرح کوئی سبق نہیں سیکھتی، تاریخ کا تو اب یہی سبق ہوگیا ہے کہ کوئی سبق نہیں لیتا۔ جہاں تک حلیفوں اتحادیوں اور دوستوں سے بیوفائی کا تعلق ہے تو امریکا اس شعر پر ہمیشہ پورا اترا ہے، وہ یہ جانتا ہی نہیں کہ وفا کیا شے ہوتی ہے اس سے وفا کی امید رکھنا دیوانگی سے کم نہیں، امریکا نے اپنے 1776 کے حلیف شاہ فرانس کے ساتھ بیوفائی کی جس نے ابتدا سے امریکا کی مدد کی اور اسے اسلحہ اور معیشت میں تعاون دیا، اور جب اس کے خلاف انقلاب آیا تو امریکا نے چپ سادھ لی۔ اور تو اور کینیڈا، فلپائن، آسٹریلیا، عرب ممالک سب کے ساتھ یہی کیا۔ سرد جنگ کے دوران پاکستان کو کمیونزم اور سوشلزم سے ڈرا کر فوجی اڈے لینے اور پنجے گاڑنے تک حلیف بناکر رکھا، پھر سوویت یونین کے افغانستان میں داخلے کے بعد جب یہ جنگ گرم جنگ بن گئی تو بھی، پاکستان ایک محروم حلیف کی طرح رہا، بہت سے ڈالر دیے گئے لیکن معیشت وہیں کھڑی رہی، ایٹمی پروگرام پر قدغن بھی رہی اور دھماکے کرنے پر کون سا حلیف کون سی دوستی، پاکستان پر پابندیاں لگادی گئیں، اور جب خود افغانستان میں گھسے تو پھر پاکستان کی ضرورت پڑی پھر حلیف بن گئے لیکن زیادہ تر رویہ حریف والا ہی رہا، اب تو پابندیاں بھی ایسی لگائی ہیں کہ سانس لینا بھی مشکل ہے، ایف اے ٹی ایف، آئی ایم ایف، عالمی بینک اور سر پر بھارت سوار کردیا، دہشت گردی کے خلاف جنگ کے نام پر پاکستان کو ہلا کر رکھ دیا گیا ہے، بس ہاتھ جوڑ کر امداد مانگو تو کچھ ٹکڑے سخت شرائط کے ساتھ دیدیے جاتے ہیں۔ ایسے ملک کے کسی حکمران اور کسی پارٹی سے وفا کی امید، عجیب خواہش ہے۔
اگلا چیلنج بھی درپیش ہے جو دراصل چین امریکا نیم گرم جنگ ہے، اس جنگ میں بھی دونوں براہ راست جنگ نہیں لڑیں گے ان کے پٹھے لڑیں گے، ٹرمپ کے آنے سے چین امریکا کشیدگی کم نہیں ہوگی، بلکہ اگر یوکرین جنگ بند کروادی تو امریکا کو مشرق وسطیٰ کے لیے فرصت ملے گی ساتھ ہی روس کو بھی، پھر مشرق وسطیٰ میں میدان سج سکتا ہے۔ اور چین کے خلاف بھارت کو استعمال کرکے اسے روکا جائے گا، توپاکستان کو کیا ملے گا، صرف ایک اختیار… کس کا پٹھا بننا ہے ؟؟ بس اس فون کال تک سب اچھے دوست ہیں۔